政情：搞搞政：高靜芝倡現金代送禮

辦年貨人潮近日逼滿大街小巷，婦女事務委員會主席高靜芝尋日講起籌備過年，認為送包裝禮物並唔環保，最怕仲係啲禮物唔啱用，造成無謂嘅浪費，所以佢建議與其送禮，不如改送現金好啲，等收禮物嘅人可以買自己啱心水嘅物品。

高靜芝尋日出席大埔區一個環保活動時大講環保之道，話除咗過時過節可以好環保外，平日生活亦可以減少製造廢物㗎，佢仲自嘲以前好蠢，經常亂使錢買好多衫返屋企，但後來發現好多衫都未着過，甚至連招牌都未剪，浪費之餘，事後處理仲好費神添。家吓佢學識每逢購物前都經過深思熟慮，有需要至買，一來避免為屋企製造垃圾，二來可以慳番唔少錢，識得用嚟投資仲會有回報添！

精明消費之外，高靜芝亦追求貨品質素，尋日見佢挽住一個以混合質料製造嘅Chanel手袋，佢透露個手袋係兩個月前去美國公幹時買，仲話買嘢買貴啲都冇所謂，最重要係實用同耐用，好過貪平買返屋企得個擺字。