政情：蘇菲谷足運遲到搵替身
本地足球發展緩慢，球圈好多怨言，尋日經濟動力搞咗個「香港足球發展研討會」，本來係由香港足球總會主席夫人、經濟動力立法會議員「蘇菲」梁劉柔芬擔頭，加埋佢嗰位任足總主席嘅老公梁孔德，但蘇菲遲大到，搞到要搵黨友臨時拉伕上場。
蘇菲本來要負責開場時致歡迎辭，但當約二百人坐齊時，走上台嘅卻係蘇菲嘅經濟動力拍檔林健鋒（Jeffrey），原來蘇菲尋日忽然要帶駐港領事參觀志蓮淨苑，趕唔切出席研討會，惟有搵Jeffrey臨時撐場。Jeffrey透露，佢喺美國讀大學時曾踢過校隊甲組，仲得過唔少獎盃、獎牌。
蘇菲雖然遲咗現身，但都冇錯過研討會，仲喺台下坐定定聽老公發言。
梁孔德發言時，蘇菲（箭嘴示）同其他參加者一樣靜心聆聽。