政情：大舊發威一入球兩助攻
立法會足球隊近年成績唔錯，尋日佢哋同大律師公會足球隊對賽，大勝四比○，新一年開頭彩，皆因社民連嘅「大舊」陳偉業發揮超水準，一再協助球隊建功，可以話係今次嘅贏波功臣。
以往立法會足球隊嘅入球大部分都係由外援射入，但尋日入四球，卻有最少三球同大舊有關。點解？因為佢除咗射入一球之外，仲有兩球都係喺佢勁射「撻Q」之後，由外援捕捉機會補射入網。雖然大舊射術一般，但佢做柱躉式中鋒真係一流，有幾球都係靠佢用頭槌二傳製造埋門機會，連大律師公會嘅後備席都傳出驚嘆聲：「Set得靚喎！」
不過，尋日大狀隊落場踢波，卻唔見公文袋幾個大狀捧場，佢哋係怕唔知撐邊隊吖，定係費事捧場呢？現任大律師公會主席高浩文帶埋三歲半嘅囝囝到場，高主席話，自己平時多數睇欖球比賽，唔係太好踢波，但囝囝就好鍾意喎！
大舊喺球場發揮超水準，帶挈立法會足球隊贏波。