政情：硬撐申亞三政團畀人跣

政府申亞夢碎，日前立法會財委會嘅支持票更低到只得十四張，政圈人士都大表詫異，因為賽前公開舉牌反對嘅只有建仔，掹車邊計埋富貴黨，點知唔少建制派議員臨時放飛機，甚至臨陣棄船，投入反對陣營，剩低專業會議、工聯會同經濟動力三個政團死忠派攬住政府隻沉船，搞到工聯會嘅KK黃國健好㷫咁公開指摘，部分建制派議員見船沉就即刻逃生，暗踩佢哋唔夠義氣。

高官唔再畀面跳船黨

財委會日前審議民政事務局要求就申辦二○二三年亞運撥款六十億元時，事前建仔講明唔支持，由於政府喺上月尾急急拉到工聯會轉軚，形勢上似乎未係全輸，加上好多建制派議員都冇表態，所以政府內部曾估最多差幾票，點知出嚟嘅結果咁一面倒，民政事務局嘅德成局長激到眼紅紅、熱淚盈眶，港協暨奧委會嘅霍震霆更加聲都唔想出。

點解賽果係四十對十四﹖KK喺議會都講到明啦：「隻船就沉嘅時候，好朋友都會跳船。」講緊邊個﹖梗係唔係由林健鋒領軍嘅經濟動力、講體育好上心嘅專業動力梁美芬等，更加唔係孭上轉軚之名嘅工聯會。至於會唔會係除譚偉豪外一直動向飄忽嘅四散人，甚至睇到最後投咗反對票嘅謝偉俊等，大家真係要自己估嘞。

不過，喺關鍵時刻缺席投票嘅李鳳英、黃宜弘、詹培忠等，就被形容冇協助平衡隻已經傾側嘅船，任由隻船沉落海底。事隔一日，政圈傳話，政府高官對呢宗「畀人跣」事故㷫到爆，更有對呢班「跳船黨」唔再畀面嘅講法。