政情：搞搞政：特首辦facebook厚顏無恥

前日政務司司長唐唐拍住特首辦主任Raymond譚志源上陣，搵埋香港羽毛球新舊一姐葉姵延同陳念慈打混雙友誼賽，諗住為爭取申辦二○二三年亞運會造勢，點知變倒米趕客兼有後遺症，搞到特首辦facebook專頁「上亞厘畢道」被人洗版。

截至尋晚八點，呢段短片吸引咗約二十個網民留言，但幾乎清一色鬧爆，狂插佢哋幾十萬一個月去打波之餘，更狠批政府用納稅人錢開facebook，原來為一味幫自己「讚好」、上演無聊騷。

封口唔回應批評

一名網民評語一針見血，指出面大把人捱緊特長低薪工時，交緊昂貴租金，但係班高官淨係識胡胡鬧鬧打吓羽毛球、格吓劍（日前鬍鬚曾教學弟打西洋劍）：「你哋玩夠未呀！開個facebook只懂做show。」亦有網民揶揄唐唐：「浪費時間打羽毛球，不如諗吓點樣搞好香港經濟，唐司長。」

「上亞厘畢道」管理員對呢啲尖銳意見全部冇回應，唯一一個留言係前日傍晚解答網民查詢，話「今次友誼賽於禮頓山社區會堂進行」，亦係「上亞厘畢道」開張以嚟首次回應網民。對批評視而不見、封口唔講，但有利宣傳就急不及待回覆、選擇性回應，唔通就係「上亞厘畢道」嘅特色？