淫賤黎又發爛渣　爛果報妖言惑眾

爛果報又又又又又玩抹黑，係吖，係好多個「又」吖，而且抹黑嘅對象例牌又係本港首富李嘉誠先生。叮！淫賤黎死纏爛打，玩嚟玩去都係呢招，厭唔厭啲吖！

今次點樣抹黑呢？件事係咁嘅，爛果報唔抵得李嘉誠重建深水灣道七十九號大宅，早排添油加醋，生安白造，指李家大宅獲贈近萬呎樓面，政府明益富豪喎，簡直係妖言惑眾，一派胡言。咁都仲未夠，爛果報尋日又大字標題話「李嘉誠大宅再刮萬呎官地」，指「大宅一條超過四十米長的私家路，以及近萬平方呎的私人花園與會所設施，全是政府以短期租約形式租予李家，無經過公開招標，更無限期自動續租」云云。

叮，爛果報惡意中傷，愈作愈大，愈作愈離譜，令人嘆為觀止。事實係，政府批出短期租約係一貫做法，唔係只限於獨立屋，亦包括村屋及其他私人物業，呢啲物業遍布港九新界。呢嗱，爛果報自己都引述地政總署嘅數字，指「同類型租約全港有約一千二百份」喇。既然係咁，又何來政府「明益」李先生呢？再講吖，李家大宅絕大部分涉及短期租約嘅土地位於山坡，業主必須負責有關山坡嘅維修保養，點解爛果報提都唔提呢？

最無厘頭嘅係，爛果報作到冇嘢好作，居然話李先生篤信風水，所以對舊居始終情有獨鍾喎。哈，香港首富仲要靠風水？講出嚟都冇人信喇。正如有人話齋，李嘉誠先後喺皇后大道西、士美菲路、英皇道及華人行設置辦公室，其中士美菲路風水差係人都知，但李先生當年嘅資產足足上升咗十二倍。查實李先生並非篤信風水，佢咁多年嚟搬到邊旺到邊，生意愈做愈大，資產愈來愈多，全憑獨到嘅投資眼光，所謂篤信風水，九唔搭八，荒謬絕倫。

講到風水，淫賤黎有需要搵人睇睇風水就真。爛果報誨淫誨盜，反中亂港，被人唾棄；加上壹淫媒喺台灣燒銀紙，流血不止，依家正吊緊鹽水，苟延殘喘，所以，爛果報咪惟有靠捏造事實、譁眾取寵來促銷囉。呢，李嘉誠先生睇唔起自認契弟嘅淫賤黎呢種人，拒絕喺爛果報登廣告，佢就發晒爛渣，公器私用，惡意針對李先生，抹黑、唱衰、滋擾，無所不用其極。可惜吖，契弟就係契弟，無論淫賤黎點樣發爛渣，人哋都唔會畀廣告佢㗎喇，食唔到嘅葡萄始終都係酸嘅，早抖啦！

講到底，對付淫賤黎呢種人，絕對唔可以姑息，佢做初一，你做十五，以其人之道還治其人之身，咁先至可以令佢得到應有嘅報應。例如佢煽動仇富情緒吖嘛，你可以發起反淫行動㗎，正如毛伯伯話齋，要掃除一切害人蟲，全無敵！