政情：鬍鬚曾拉學弟撐申亞

今個禮拜五立法會財委會就會審議政府申辦二○二三年亞運會撥款，繼煲呔曾前日出席撐申亞大會後，佢嘅「真兄弟」財爺鬍鬚曾亦唔放過抽水曝光機會。

政府新聞處尋日推出一條長約四分鐘嘅新聞短片，叫「財爺傳劍術，教化年輕人」。自詡玩西洋劍了得嘅鬍鬚曾，每個禮拜返母校喇沙書院教授劍擊，佢尋日約班師弟到官邸，仲即場露兩手同師弟練劍，一時間官邸內刀光劍影。短片中，鬍鬚曾着住一套劍擊賽事用嘅黑色全身保護衣，同師弟格嚟格去，當師弟練習攻防動作過關，鬍鬚曾仲會給予鼓勵，企定定畀師弟用劍拮心口。

去到尾段，真正戲肉嚟嘞，幾位喇沙學生對住鏡頭，稱讚鬍鬚曾係佢哋嘅榜樣，跟住失驚無神播出一句：「至於申辦二○二三亞運，佢哋又有乜意見呢？佢哋都支持！」然後，短片播出三位喇沙學生喺鏡頭前撐申亞，成為政府硬推申亞、反攻政黨嘅馬前卒之一。

武俠小說中嘅劍客行事磊落，但鬍鬚曾為政府申亞出招，卻拐彎抹角，「傳劍術」只係幌子，「教化人」都係假嘅，其實係一輯申亞宣傳片，變相擺咗班喇沙學弟上枱。鬍鬚曾為撐申亞不惜借學弟過橋，唔止心口畀人拮，背脊肯定被插到花晒。