政情：發叔選村代表有暗湧

早前講過多名原居民代表喺村代表選舉落敗，而元朗新田鄉永平村原居民村代表選舉，角逐連任嘅新田鄉事委員會主席文富穩，前日亦爆冷以三票之差落敗，輸咗畀一個叫文志生嘅新面孔，由於文富穩係新界鄉議局主席劉皇發嘅嫡系，新界人人心思變，令發叔競逐連任龍鼓灘原居民代表響起紅色警號。

文富穩多年嚟循原居民村代表身份，進身新田鄉委會主席，跟手做埋元朗區區議會當然議員，今次喺村代表中敗陣，得票八十八票，輸畀取得九十一票嘅文志生，鄉委會主席同區議員身份亦會一併失去。

有分析指文富穩爆冷輸畀一個政壇名不經傳嘅對手，加上早前梅窩鄉事委員會涌口（北）居民代表黃福根同白銀鄉原居民代表黃偉才，亦雙雙連任失敗，反映新界人已暗中起革命，想推翻舊有勢力，所以，二十三號輪到發叔競逐連任龍鼓灘原居民代表，都未必穩坐釣魚船o架！