政情：羅富昌加碼掃賭業股
廠商會會長黃友嘉尋日率領多位副會長亮相，啱啱遊完獅城充電返嚟嘅第一副會長羅富昌話今次奇遇多，本來帶晒泳褲，直奔某新落成酒店五十五樓頂層嘅無邊際泳池，點知寒流偷襲，氣溫急降至二十度，喺室外戲水，都咪話唔凍。
於是佢索性返酒店大堂搵其他節目，順便查詢食早餐時間同無線上網服務，點知服務員態度敷衍，答非所問，令佢好失望，唯一收穫係見識咗金沙賭場繁華一面。佢盤算緊投資賭業股，考察完金沙後，更確信眼光冇錯，嚟緊仲會加碼掃貨。
廠商會高層農曆年驛馬星動，初二晚出發去中東考察，由會長黃友嘉帶隊，走訪杜拜、科威特同沙特阿拉伯，中東資源豐、熱錢多，商機無限。廠商會副會長施榮懷就報喜話，今屆工展會丁財兩旺，嚟緊四月會添食，喺旺角花墟公園舉行第二屆食品嘉年華喎！
