短打長擊：警隊新一哥 避做Sorry Sir

曾偉雄接棒鄧竟成做警隊「一哥」，市民自然希望新人事有新作風，但要改善警員的紀律和提高返工嘅興趣係唔易。

眾所周知，警務人員先前屢爆醜聞，更搞到鄧竟成要三度道歉，因而被同袍謔稱為「Sorry Sir」而不是「Yes Sir」。最令市民火滾的一次是○九年八月，旺角警署警員梁禮仲被控在警署內強姦及非禮女報案人罪成，搞到鄧竟成要親自致電向四名女事主道歉。

香港好似中咗邪，不是嗎？除了淫警，又有淫師、淫父、淫社工……係喎！有錢富商唔叫「淫」，叫Sugar Daddy，幾鬼死文雅好聽。

言歸正傳，據警方統計，二○一○年上半年，平均每天發生四宗非禮案，每三天便發生一宗強姦案，咁搞落去，香港真會淪為「野獸都市」、「禽獸之都」！

另一方面，有團體指警方查案手法令人憤怒，尤其掃黃期間「放蛇」時，竟有警員多次享受性工作者的手淫才披露身份。大佬呀！咁擺到明就係唔夠專業啦！雖然差人唔係社工，但如果紀律部隊真係本着一點良知良能（唔好去到「仁智勇」咁高層次），就不會對受害婦女出言不遜，更不會貪小便宜享受免費「飛機餐」。

前一哥退休印印腳集郵，警隊要有新人事、新氣象，新一哥曾偉雄真係要好好地諗吓計，好好培養警員的道德意識，唔好口花花見人條裙短就讚人條腿靚，切記你係打擊罪惡的「男子漢」，而不是Sugar Daddy。最重要係挽回市民信心，唔好再做Sorry Sir。