毒蛋長驅直入 笨蛋廢話連篇

毒蛋襲港，防不勝防。德國雞蛋及肉類受二噁英污染，事件愈搞愈大鑊，最新測試顯示污染程度比原先估計嚴重得多，部分飼料所含二噁英水平超標達七十幾倍，四千七百幾個德國農場被勒令停售家禽、豬肉及雞蛋，問你怕未。

你怕佢唔怕，人稱周一鑊嘅食物及衞生局局長周一嶽好老定咁話，港府三日前已經收到通知，知道德國蛋有問題。咁就奇啦，既然當局早就知道有德國毒蛋流入本港，點解唔第一時間公布，仲要拖到尋日先至出嚟解畫呢？大家都知道，二噁英係一種毒性好強嘅物質，唔好彩吸入嘅話，輕者身體受損，重者可以致癌，周一鑊居然若無其事咁，秘而不宣，瞞而不報，簡直係靠害！

周一鑊話喎，德國雞蛋只佔本港入口蛋百分之一，最後一批一個月前入口，市面已經賣晒，而且二噁英要長期攝入先至會致癌。照佢咁講，本港入口嘅德國蛋數量唔多，影響輕微，而且已經賣晒，米已成炊，查嚟都冇用，所以咪唔使公布，唔使做嘢咯。

叮！呢啲咪叫做唔見棺材唔流眼淚囉。周一鑊分明係擘大眼講大話，有人踢爆，其實市面仲有德國蛋出售，而且除咗雞蛋之外，德國入口嘅禽肉、豬肉、火腿、奶油、蛋糕、餅乾亦可能受到污染，周一鑊又知唔知呢？再講喇，本港每日消耗雞蛋數量龐大，就算德國蛋只佔百分之一，影響亦絕對唔小o架。

飲食業人士踢爆，當局平時唔做嘢，臨急抱佛腳。市面上嘅食物種類繁多，但食物安全中心每年只抽檢百幾個樣本嘅二噁英含量，可能一個月都驗唔到一隻蛋，唔出事就奇啦！

睇吓人哋南韓同斯洛伐克，一知道德國蛋出事，第一時間宣布禁止德國牲畜製品入口，而英國及荷蘭等國家亦即時加強檢驗相關產品。反觀港府仲係輕描淡寫，若無其事，真係豈有此理！

最好笑嘅係，周一鑊反應遲鈍，把關不力，反而將責任推畀市民，叫大家買德國蛋時查清楚係咪來自問題農場喎，真係畀佢吹脹！喂，出事嘅農場成四千幾個，邊個有問題邊個冇問題，連港府自己都矇查查，市民又點樣分辨吖？

唉，德國有毒蛋，香港有笨蛋，靠呢啲笨蛋官員替港人把關，真係死咗都唔知乜嘢事。冇辦法喇，香港時運低，如果大家唔想食到嗰「百分之一」嘅毒蛋，惟有自求多福，叮！