政情：名人熱捧《愛上鄧麗君》
《愛上鄧麗君》音樂劇上演，喺過去嘅星期日（一月二日），香港愛滋病基金會獲太子珠寶鐘錶贊助門票善款，好多人無懼寒風，畀面基金會主席「金刀梁」梁智鴻齊撐場。唔講唔知，太子珠寶主席鄧鉅明（Jimmy）同金刀梁一家好熟，兩家人嘅囝囝都叫做Eric，生日只差一日添！呢晚鄧鉅明太太同梁智鴻太太不約而同着住閃令令嘅靚衫，狀甚老友。
男高音莫華倫都帶埋太太同囝囝嚟撐場，囝囝今年十四歲，不過生得好高大，媽咪踢爆話，囝囝咁嘅年紀好難買衫，所以有時都會着爸爸嘅衫鞋，當晚佢就着住爸爸對鞋喇。
太子珠寶嘅朱繼陶伉儷（左一、二）同鄧鉅明夫婦（右一、一），拉隊齊撐梁智鴻（左三）。右三為媽打劉李麗娟。
莫華倫（右）同太太有子初長成，個仔長得差唔多佢哋咁高。