政情：DJ拒助宣傳 周一鑊食檸檬

政府解決骨灰龕難題無方，早前雖然公布咗啲一類、二類名單，外間嘅反應卻係鬧不停，食物及衞生局於是諗計，希望加強宣傳幫吓手。尋日，電台節目主持人車淑梅出席一個活動時，不經意透露政府曾經搵過佢拍類似嘅廣告，但佢對人身百年後嘅處理方法同政府倡議嘅唔同，所以一口拒絕咗。大大隻檸檬掟番畀食物及衞生局局長周一嶽。

政府對骨灰龕供不應求一事後知後覺，近期只好透過宣傳海葬、網上悼念等紓緩社會嘅不滿聲音。不過，車淑梅尋日就話，佢對海葬好有保留，事關早前曾陪朋友出海，為朋友嘅姐姐舉行海葬儀式，點知全船人嘔住回程唔特止，撒骨灰嘅時候，更因為海風太大搞到骨灰撲面，有此經歷後，佢都對海葬say no啦。

佢雖然講得好搞笑，但亦同政府唱反調，難怪政府想搵佢拍個宣傳骨灰龕事務嘅廣告，佢都以個人意見同政府嘅宣傳宗旨不合拒絕咗。周一鑊嘅政策甩甩漏漏，依家連搵人拍政府廣告都食檸檬，真係羞家囉。