政情：女童軍總監走出邊太陰霾
香港女童軍總會早前爆出超齡總監違規參選醜聞後，尋日下晝三點舉行會務委員會特別大會，並選出副總監彭徐美雲做新任總監，佢四月二十六日起正式接替任滿嘅超齡總監邊陳之娟，任期三年。選舉落幕，亦令圍繞選戰嘅連串「告密」行動可以暫時鳴金收兵。
尋日嘅選舉共有八十幾名女童軍高層出席投票，由於今次選舉打破過去一人提名自動當選嘅局面，由彭徐美雲同名譽副會長李周美枝爭過，傳聞佢哋兩個背後各有名媛闊太發功，最後彭太以五十七票對李太二十七票大比數勝出，當選新任總監。
有傳聞話，邊太喺背後發功力撐李太參選，想延續喺女童軍嘅影響力，而彭太背後亦有「大家姐」級數嘅女童軍高層支持，實情如何，就只有局中人至知喇。