政情：陳家洛低票膺公文袋主席

公文袋尋日舉行新一屆領導層改選，黨魁一職因為只得梁家傑一個參選，所以無驚無險下順利接咗余若薇嘅位。但主席、內務副主席同秘書長三個高層職位都有人出嚟爭，最重要嘅主席位仲係由兩個大學教授，即秘書長陳家洛同執委鄭宇碩爭，暗戰一輪後袋巾傑撐嘅陳家洛以八十一票比七十票，僅以十一票之差擊退鄭宇碩當選主席，不過，兩個人勢均力敵，顯示黨內好分歧。

陳家洛低票當選，反映黨內的確有唔少人對佢嘅處事用人手法，甚至激進立場、包括力主公民黨參與「五區公投」有微言，甚至不滿。佢尋日當選後，發表感言亦大有招安之意，佢話會虛心聆聽黨內唔同聲音、唔同意見，唔會做一言堂。

當傳媒要求陳家洛同鄭宇碩影張握手相時，兩人即時冇乜反應，有執委更喺後面大叫「唔使喇」，將黨內暗鬥浮上台。據傳，尋日選舉開始前，更有不滿陳家洛嘅執委，拉起橫額高調力撐鄭宇碩，擺明係要落陳家洛面。

雖然新任黨魁袋巾傑話，陳、鄭二人選前曾承諾過，唔理結果係點都會留黨服務，只係好似婚前協議書嘅選前承諾夠晒騎呢，簽咗唔代表畀到人信心，反而引人猜測點解需要咁做？