政情：阿陶企硬內鬥倒閣派

「維園阿哥」任亮憲捲入強姦同非禮指控，令社民連嘅黨內矛盾激化，仲搞到現任黨主席陶君行同樣一身蟻。因為前主席黃毓民長假返港後，即刻向自己一手提攜嘅阿陶開拖，指摘對方領導唔掂，仲形容佢係扶唔起嘅阿斗。阿陶食咗咁耐波餅，尋日忍無可忍，喺電台上大呻唔明黃毓民嬲乜，仲揮棒直擊「外鬥外行，內鬥就好內行」嘅人，至於係咪又有一波倒閣，阿陶都慨嘆「又嚟」？

傳公投三子有人未還錢

政圈盛傳，下個月社民連舉行會員大會時，可能再現倒閣。其實，自阿陶喺舊年做咗主席後，社民連就不停爆大鑊，上一波倒閣後，仲有前秘書長季詩傑辭職。坊間盛傳，當時倒閣主力任亮憲嘅背後有黃毓民，家吓黃毓民或會披甲上陣，所以先有阿陶被寸係阿斗，後仲有長毛梁國雄或者大舊陳偉業會被撐攝政做主席嘅講法；甚至有傳倒閣派或拉隊另組新黨。

攻勢一浪接一浪，阿陶亦唔肯再捱打，尋日喺電台講到維園阿哥單嘢，講明佢冇直接要求對方退黨，但亦不忘「有骨」咁話，維園阿哥件事好難設局，即使係設局，都要有人中計至得！至於佢同黃毓民嘅恩怨，阿陶就話到明「唔樂觀」。

咁如果下個月又有人倒閣，佢會唔會落台呢？阿陶好大反應咁話：「又嚟？不如逐個月嚟啦！」仲揶揄立法會都唔會就同一議題一年內辯論多過一次喇。所以佢唔容許倒閣外，亦唔會落台。佢雖然呼籲大家以事論事，唔好「外鬥外行，內鬥就好內行」，但亦指摘有人唔遵守協定。

不過，社民連嘅炸彈都唔少，坊間另有傳聞係話參與五區公投嘅三子，借咗社民連買樓嘅會址基金嚟做競選經費，但有人到依家都未還錢，仲話隨時就此爆大鑊添。