政情：鬍鬚曾不誠實使用電腦

財爺鬍鬚曾前日出席中總論壇時發表謬論，話如果政府喺下月預算案大幅派糖，可能會進一步刺激通脹，又唔認自己係守財奴，反駁庫房水浸之說，畀政黨狂轟佢誤導市民、謊話連篇。

隱瞞雄厚儲備及盈餘

原來當晚佢仲喺facebook整咗個有關預算案嘅簡單電子遊戲，遊戲名係「假如我是財爺」，市民進入遊戲後，可自由選擇喺未來一個財政年度內，投放幾多公帑資源落教育、保安、基建、食環、醫療、社福同紓緩措施等七大開支範疇，喺調整每個範疇嘅開支時，仲會即時彈出市民嘅回應，但內容就好有問題。例如將紓緩開支調高，電腦就話市民會有錢買多兩部電視睇，唔明白好多基層家庭連開飯都成問題，即使政府派錢都唔會亂用嚟買電器；如果將紓緩開支減少，電腦就會出現「好天斬埋落雨柴」等正面評語，非常有誤導性。

遊戲設定咗庫房來年度只有二千五百億元收入，罔顧政府今年賣地收入創歷史新高，印花、利得同薪俸稅都預計爆晒燈。如果遊戲玩家使大咗，總開支超過呢個數，整盤帳就會立即錄得赤字，並且畀「某啲傳媒」批評為「嚴重財赤，預算案能否通過」？擺明想嚇市民。如果玩家使少啲，甚至刻意玩嘢減到政府來年一毫子都唔用，傳媒報道標題居然唔係「曾俊華守財奴，政府面臨倒台」，而係「今年儲到錢，下年有事都唔驚」，完全係扭曲事實。

不過最誤導嘅係，成個遊戲都冇提過政府依家坐擁上萬億元累計儲備，同埋早前有會計師行估計今年會錄得上千億元盈餘，令市民誤以為即使出現輕微財赤都好大鑊。其實即使將遊戲設定嘅開支水平增加一倍，來年出現二千五百億元財赤，政府仍會剩番八至九千億元儲備，根本完全唔使驚。

呢個遊戲就算唔構成欺詐或發放假消息，起碼都涉及不誠實使用電腦罪！個遊戲應該加多一項，就係鬍鬚曾嘅不誠實指數，肯定爆晒燈！