短打長擊：吹水充大頭 香港有排愁

政府庫房水浸，可是扶貧不力，有團體力數其七宗罪，便多與衣食住行有關。在高官亂吹水下，香港幾好都有——啲高薪厚祿而不食人間煙火的高官吖嘛！唔通佢哋真係睇唔到香港窮人多達一百二十多萬？睇唔到三十萬稚子要捱餓？睇唔到在職貧窮惡化？

通脹持續惡化，買斤菜心都要成十八蚊。高官最叻耍官腔：唔排除提早檢討綜援。「唔排除」嘅潛台詞即係「唔知幾時」，等得到你好彩，等唔到你運滯，買本流年天書睇吓有冇運行啦！

講開高官，講話愈來愈有政治家味道。財爺鬍鬚曾愛上鏡，但又謙稱自己唔係「視帝」，咁即係「影帝」啦，仲威！佢老哥唔留喺香港，好好度吓就嚟嘅財政預算案，卻飛去智利同巴西，跟住又整篇「老殘網誌」，一味吹噓何年何月何日去東又去西，吸引乜資物「脂」，總之為建港投下無比愛心及毅力！香港之所以未去到有二百萬窮人，全賴有佢夠偉大。

鬍鬚曾一副「我係財爺我怕誰」的氣吞山河嘅樣，話以後「會繼續有更多開拓行動」。阿哥，留多啲精力計好盤數啦！你連續幾年都計錯數，明明有盈餘卻年年呻窮，經過幾次狼來了，相信冇人信你老點㗎喇！你一派「無所畏」與「無所謂」的閒情，一味叫人「留言」唔使「留鬚」，咁就可以學內地某些大款高官「不計後果」，即係「後果可以忽略不計」！

筆者從你的吹水網誌悟道：你最有資格出本《兔年風水運程天書》，你話衰嘅，我做到加零一，咁就有運行喇老友！