又見毒腐竹　食得不是福

內地有作家寫咗一本《民以食為天》嘅書，專門踢爆各種問題食品。佢講咗唔少真實嘅畸士，比如中央主管農業嘅領導人有次視察一個養豬場，見到一種豬毛色光亮、肌肉飽滿，覺得好可愛。點知豬農話，呢種豬係養畀城市人食嘅，佢哋自己唔會食。何解？原來係用哮喘藥餵大嘅。高官問：咁你哋知唔知哮喘藥會食壞人o架？你估豬農點答呀？知！不過城市人有公費醫療，冇事嘅！

錢真係威力無窮，人為咗錢，乜嘢傷天害理嘅事都敢做，仲夠膽喺領導人面前直認不諱。奇怪嘅係，嗰位高官好似對佢冇晒符咁，難怪呢幾年哮喘豬賣通街啦。

何止哮喘豬！問題食品多不勝數，無處不在。好快就過年嘞，團年飯打邊爐，大年初一食齋，都唔可以冇腐竹。不過，太一叮提醒大家一句，最好咪去內地買腐竹。

深圳市場監管局抽檢市面嘅腐竹，發現好多唔合格。原來不法商人為咗降低成本用劣質黃豆做原料，佢哋用吊白塊漂白黃豆，令腐竹賣相好睇啲，又加入膠質令腐竹重秤，呢啲腐竹色澤光鮮，但係分分鐘食壞人。

吊白塊係乜東東？原來係甲醛同二氧化硫嘅混合劑，以前係用嚟沖菲林嘅，根本唔適合食用。過量嘅二氧化硫會造成哮喘，甲醛劑量過大仲會引致肺癌。

其實，毒腐竹只係冰山一角咋。西安早前有黑心攤販將貓肉、鴨肉放喺羊尿裏面浸出羶味再當羊肉賣。江門有地下工場用病雞死雞做鹽焗雞，河南有無良商人用色素將豬肉染紅當牛肉賣。就連河粉呢種最簡單嘅食品都畀人做手腳，有關部門最近抽查東莞多間河粉加工廠，合格率只有百分之七。原來又係錢作怪，奸商為咗降低成本選用發霉大米，漂白後用嚟製河粉，唔單止質素低劣，仲含有致癌嘅黃曲霉素！所以話，黑心食品防不勝防，香港人北上消費隨時中招。

有人會話，少啲北上消費咪可以避過大難囉。如果咁諗就太天真嘞，試問香港嘅豬牛羊、雞鴨鵝、副食品，有邊樣唔係來自內地㗎？內地食物出問題，香港人又點甩得身？

有人又會話，香港同內地一早就建立咗通報機制，內地食品有問題，港府第一時間知道，咪可以防患於未然囉。哈，咁諗唔單止天真，簡直係傻到極。冇錯，中港兩地之間係有通報機制，可惜如同虛設，呢幾年每逢有問題食品襲港，邊鋪唔係傳媒報道後，政府先至忽然瞓醒呀？

大家如果唔想屙嘔肚痛，甚至癌魔上身，記住唔好以為「食得是福」，小心飲食先至係萬全之策。叮！