政情：泛民捧王桂壎選法律界

法律界功能組別議席係泛民嘅囊中物，公文袋嘅吳靄儀前前後後做咗十幾年，佢呢個月尾就六十三歲，早喺○三、○四年已暗示明示想退休，但一直搵唔到合適接班人。最近側聞泛民唔想將法律界個位拱手相讓畀建制派，有人提議抬律師會會長王桂壎上轎接棒。

其實法律界傳過人權大律師潘熙、現任公文袋執委郭榮鏗等係法律界功能組別議員人選，但都唔成事，泛民最後諗出一條「絕世屎橋」，游說最初循法律界功能組別出道嘅「李漢奸」李柱銘食回頭草，想佢由直選轉番去選法律界。六十三歲唔玩，搵個七十幾歲嘅接班？唔係嘛？

王桂壎本身唔屬於任何泛民黨派，過往較少就政治問題表態，一直不被視為泛民一員，不過由於佢做過立法會法律顧問，同好多泛民法律界人士好熟，最重要嘅係律師會喺佢掌舵年幾以嚟，一洗過往嘅親建制形象，多次積極主動就社會關注嘅政治同民生議題發聲，立場都同泛民非常接近，或者係咁，佢先成為人選啩。