政情：黃進達潮推網上報團

唔經唔覺，康泰旅行社太子爺黃進達（Jason）坐正董事總經理已經一段日子，經歷馬尼拉人質事件，已呈半退休狀態嘅爸爸兼幕後老闆黃士心都大讚囝囝成熟唔少。尋日黃士心公開大爆Jason喺八○年出世，仲為囝囝做啦啦隊，叫大家支持佢：「年輕人要支持年輕人！」

講番Jason，佢○三年就入康泰半工讀，由低做起，喺爸爸嘅嚴格要求下，佢人工唔高得過九千，最多方便佢讀書畀佢返半日，不過唔夠使都有阿媽資助嘅。捱咗七年，舊年升正做董事總經理，年屆三十就睇咁多嘢，壓力之大絕非一般人能承受，佢最愛嘅籃球要疏遠，連健身都係一個月去一、兩次咋。

尋日康泰開年度記者會，Jason好潮咁將發言重點放晒入iPad，一路睇一路讀，仲話嚟緊要擴展網上服務，唔止自助遊，連報旅行團都可以留位同信用卡過數，喺網上一take過，果然有年輕人嘅一套。