政情：彤叔為教學酒店揭幕
新世界集團投資十三億元興建嘅全港第一間教學酒店，尋日正式開幕，新世界主席「彤叔」鄭裕彤當然有現身，大仔鄭家純帶埋公子鄭志明、千金鄭志雯到中大，雖然未見彤叔長孫鄭志剛身影，但彤叔就興奮到好似抱孫咁，着住對黑色Nike波鞋，精神奕奕上台主禮。
中大校董會主席鄭海泉、前中大校長李國章都有撐場，中大校長沈祖堯更自爆喺○九年酒店開幕時，已靜雞雞幫襯過，發現牛扒極之正斗。尋日儀式全程由純官擔大旗，主禮完畢，佢仲滋油淡定咁話樓市可再升十多個巴仙，股市亦處於牛市。
教學酒店計劃分兩部分，包括香港沙田凱悅酒店同命名為鄭裕彤樓嘅教學大樓。酒店以五星級國際酒店規格管理，設有五百幾間客房，為中大酒店及旅遊管理學院學生提供實習機會，仲有示範廚房、品酒實驗室，以及由學生經營同管理嘅餐廳。
彤叔乖孫鄭志明（左）同鄭志雯（右）逐漸參與家族生意。
彤叔着對黑色波鞋出席教學酒店開幕禮。