政情：議員口水浸立會

悠長嘅聖誕新年假期過後，立法會今日就會舉行踏入二○一一年嘅首次大會，呢個會議堪稱重量級，議程到尋日都仲修訂緊，因為勞工界嘅李卓人、葉偉明臨尾衝刺，就最低工資條例動議新嘅擬議議決案，加埋原本由社民連嘅「長毛」梁國雄提嘅廢除最低工資建議，班立法會議員真係新年開工就整定要開OT，唔單止夜晚開會開到十點，仲要禮拜四一早又接力，二○一一第一仗就搞成咁，唔通要帶埋睡袋去開會？

一日傾唔晒實要OT

立法會秘書處尋日通知，今日嘅大會議程又有修訂，主要係職工盟嘅阿人就《2010年（最低工資條例）（生效日期）（第2號）公告》作新建議，阿人希望最低工資早啲落實，建議由政府諗住嘅五月一號勞動節改為二月一號，等全港低薪打工仔早啲受惠。葉偉明提出嘅建議就有關中等收入打工仔嘅一啲技術性建議。呢兩個建議已經要廢一番唇舌，最弊係長毛早已提咗個廢除最低工資條例嘅建議，勞工界爭取咁耐先有最低工資，長毛呢個建議罕有咁靠攏商界，立法會點會少得了一番爭拗呢？

勞工問題之外，新年度首個大會嘅焦點仲有高通脹下嘅紓困措施，下個月就係財政預算案出籠期，立法會各大黨派近日已經先後向政府提交咗對預算案嘅建議，今次喺立法會動議辯論，可算係一次大晒冷，所以啲議員都預咗今次會議冇可能一日之內傾得晒。

值得一提嘅係，今日嘅議程中，仲有一項係有關申亞嘅，議員雖然係辯論促進本港嘅體育運動，但焦點卻離唔開政府興建體育場館嘅估算同申亞嘅細節，呢個動議亦有成七個議員提交咗修訂動議，所以又係一場鬥口水多嘅辯論。咁多重頭辯論撞埋一齊，有乜可能唔開OT呀？