新交津查家宅團體怒斥荒謬

【本報訊】今年第三季,政府便會推出鼓勵就業交通津貼計劃,將舊有的跨區交津計劃擴大至全港適用,但卻未能獲民間及議員支持。三十多個關注團體昨一致批評新計劃由個人申請改為家庭作單位,做法荒謬,「唔通要人簽埋衰佬紙、衰婆紙唔供養家人先可以拎?」有未能受惠新計劃的家務助理,哭訴覺得受到政府鄙視:「我哋冇做嘢咩?洗碗、派傳單唔係人呀?」

家務助理怨似行乞

立法會人力事務委員會昨日舉行公聽會聽取團體對新交津計劃意見,與會者一致要求當局實行「雙軌制」,讓申請人可自由選擇以個人或家庭做單位申領交津。北區就業問題關注組組員郭婉兒訴說,本身任職家務助理,每日工作三小時,未能達到每月工作七十二小時的申領資格。「我去大角咀做嘢,車費來回三十蚊,做一個鐘都唔夠搭車。兼職唔係做嘢咩?洗碗嗰啲係廢㗎?人工咬出嚟有血有汗㗎,我哋好似乞咁,唔覺得政府有尊重過我哋!」

委員會主席李卓人揶揄計劃應該改名為「不鼓勵就業、不鼓勵儲蓄、不鼓勵搵工,歧視婦女交通津貼計劃」,並批評當局設下了重重關卡,令計劃由好事變成了壞事。

對於當局計劃於本月二十八日向立法會財委會申請撥款,他威脅如政府不修改申領資格,會游說各黨派議員聯手迫使港府押後申請撥款,「逼佢哋諗清楚」。

勞工及福利局副秘書長楊碧筠則重申,由於計劃涉及公帑,故需全盤考慮申請人的個人及家庭經濟負擔,確保只向真正有需要人士提供支援。

Money18 新功能「18好路數」為你預測心水股票升跌機會率

團體批評港府實際收緊交津申請資格,變相閂水喉。

示威者扮演跛腳鴨,諷刺新交津未能真正幫到市民。