火魔又蒲頭 緝兇要快手

旺角花園街火燒連環檔縱火狂徒啱啱落網，筲箕灣又爆連環縱火案，而且頻密程度罕見，狂徒擺到明要挑戰市民嘅耐性同警方嘅破案能力，簡直無法無天。

元旦深夜，筲箕灣金華街一個毛巾檔突然着火，好彩附近酒樓員工及時發現，淋咗二十桶水將火救熄。消防調查認為起火原因有可疑，相信係縱火，轉交警方處理。

呢次已經係筲箕灣舊年十一月以嚟第五宗縱火案。最近兩宗發生喺上個月十九號同廿九號晚，先後有兩個果菜檔同一個海味乾貨檔被人縱火，檔口嚴重損毀。有街坊發現，兩次事發之後都見到兩名青年急急腳離開現場，懷疑同案件有關。居民都擔心花園街慘劇會喺筲箕灣重演，希望警方加強巡邏，盡快緝拿狂徒歸案。

叮！市民絕對唔係杞人憂天，小小一個筲箕灣區，接二連三發生縱火案，被禍及嘅基本上都係排檔，狂徒好明顯有針對性。以最新呢宗縱火案為例，檔主喺現址開舖已經三十年，今次已經係一年內第三次被人縱火。筲箕灣係舊區，有唔少路邊排檔，如果今日呢檔燒，聽日嗰檔燒，認真大鑊。唔怪得檔主話，聽到消防車響號經過都心驚膽跳咯。

有東區區議員話，區內排檔接連遭縱火，狂徒擺明向警方挑戰。其實，上個月初旺角排檔大火，已經打爛咗香港「亞洲最安全城市」嘅金漆招牌啦。短短半粒鐘，花園街等三處畀人縱火，近百攤檔被焚毀，有啲檔口淨係貨已經損失十幾萬，檔主一殼眼淚。就算經過搶修趕及聖誕黃金檔期，生意同以前根本冇得比。有檔販話，平安夜生意比往年少一半，「做到無晒心機」。

講真，如果縱火狂徒繼續逍遙法外，唔止筲箕灣商戶，其他地區尤其係深水埗鴨寮街及北河街、油麻地廟街一帶嘅商戶，一樣冇覺好瞓。呢啲布滿路邊排檔嘅街道，唔止容易成為兇徒落手目標，唔少地方連消防入水掣都冇，就算有都已經滿布蜘蛛網，甚至連木蓋都打唔開。大吉利是有火燭，隨時爆大鑊。

火魔當警察冇到，唔好忘記仲有「鏹魔」未落網㗎。過去一年幾，本港多次有腐蝕性液體從天而降，造成過百人受傷，警方總共懸紅百幾萬元緝兇，但除咗喺銅鑼灣掟鏹水彈嘅歹徒落網，另外幾宗同類案件都未拉到元兇。萬一雙魔打孖上，樓上地面同時發起「立體攻勢」，後果不堪設想。

計太一叮話齋，當務之急係要盡快破案，將火魔繩之於法，一旦證實係連環作案，更加要從嚴處理，以煞住歪風。如果警方再畀人明剃眼眉，市民第日惟有戴鋼盔、孭滅火筒出街o架咋。叮！