政情：范太沖涼洗碗慳水有計
「樓上閂水喉！」相信大家都唔想再聽到呢句說話。全國人大常委范徐麗泰尋日出席一個環保團體宣傳珍惜食水嘅活動時，就講起佢嘅慳水心得。
范太話大家都應該保持水質清潔，如果唔係我哋嘅子孫就要飲啲經化學處理嘅食水，而唔係天然嘅。咁佢點樣慳水法？佢就話沖涼嘅時候多數會用花灑，雖然天寒地凍浸浴係好舒服，但係最多都係一星期一次，間唔中浸下，等啲皮膚柔軟啲。
其實，佢喺家居用水方面真係幾節約㗎。佢話之前請咗個新嘅家務助理，見到家務助理開住個水龍頭洗碗，一路洗啲水一路流，佢就諗︰「點解唔用一盆水洗，洗完再裝一盆過水呢？」因為睇唔過眼咁樣浪費食水，佢忍唔住要出聲嚴禁家務助理嘥水。
為免嘥水，范太唔准家務助理開住水龍頭洗碗。