政情：嫻姐唔參選戰友未死心

原本工聯會部署以「五加一」陣式出戰二○一二年立法會選舉，其中關鍵戰役係區議會「超級議席」，內部更一直屬意由立法會前議員陳婉嫻出山再戰，但呢個部署能否打得響至今成疑。

點解咁講？嫻姐尋日出席電台節目又被主持人問起競逐超級議席一事，嫻姐話六月通過政改方案，相信政治生態將有改變，但要佢「上前線打仗」參選超級議席，「咁就未必（會）嘞」！

佢續稱，其實工聯會有實力競逐超級議席嘅人，唔止佢一個，只係工聯會嘅同事想佢出選，重返議會啫。

嫻姐以類似拆穿寶藥黨嘅口氣，喺大氣電波拒絕同僚嘅盛情好意，話：「入乜議會啫，要選o架，要經過幾個大選舉o架嘛！」強調到呢一刻都好享受目前工作，堅持無意出戰。

但工聯會內部似乎未肯接受呢個殘酷現實，黨團召集人KK黃國健話，嫻姐至今未講死唔肯重出江湖，工聯會一定會繼續游說，希望工夫用得深，鐵杵有朝磨成針喎！