政情：搞搞政：維園阿哥棄守論壇

涉嫌強姦及非禮案嘅「維園阿哥」任亮憲自醜聞爆出後，懶理會製造混亂嘅問題，繼續高調出席「炒紅」佢嘅「發迹地」《城市論壇》，每次都吸引大批傳媒爭相採訪，唔少市民仲同佢嘅支持者互相指罵，場面混亂之餘，更搶盡主人家風頭。

尋日又到開壇嘅日子，但任亮憲終於冇嚟踩場，棄守佢嘅「發迹地」，而佢嘅支持者就繼續以任發起嘅《一零憲章》為名到場。唔知任亮憲係咪終於醒覺抑或想玩失蹤？睇怕只有佢自己先知。「亂壇」變番論壇，大批在場嘅記者同工作人員都鬆一口氣。

正所謂「一雞死一雞鳴」，「維園阿哥」任亮憲倒下，但睇嚟仲有唔少「阿哥」想抄佢橋循《論壇》上位。最近亦留意到富貴黨扎根新界西嘅年輕黨員李梓敬同其他維園阿伯一樣，頻頻晨咁早排隊入場參與討論，似乎想增加曝光率，但言論未見突出。佢係咪真係咁有恒心，就要放長雙眼睇吓至知嘞。