政情：波波IT豪遊日攞嚟呻

立法會「五散人」當中嘅「波波」陳茂波同「IT豪」譚偉豪，喺早前聖誕假不約而同與家人去咗日本歎世界。

波波一家同埋細佬、細妹一行八人，去咗北海道滑雪勝地留壽都過白色聖誕，佢話一日三餐都喺酒店享用，嗰度中西日菜都有，但去得日本當然要試吓地道日本菜啦！點知一個日式套餐要二百蚊港紙之餘，啲壽司竟然及唔上香港，難怪佢有啲失望嘅。

至於IT豪嘅遭遇亦不遑多讓，佢哋一家三口也去咗東京，入住富士山下嘅民宿。IT豪話呢間民宿有二百年歷史，充滿家庭氣氛，而且戶主提供一條龍服務，菜同魚都係自家養殖，讓囝囝一嘗入住民宿滋味。

不過，呢間民宿設備太過簡陋，雖然平安夜當晚無落雪，但氣溫只係零下二度，房內只備有識發光嘅電爐一座，開咗成間房暖晒，但最弊光到瞓唔到覺，結果IT豪一家焗住熄電爐，冒住嚴寒瑟縮度過，第二晚立即改住溫泉酒店。