政情：遊埠當政績鬍鬚曾充大頭

特區政府政績乏善足陳，高官人人愛自吹自擂，財爺鬍鬚曾更加係表表者，以自我吹噓為首務。

理應忙緊二月預算案嘅鬍鬚曾，竟然不務正業，揀喺呢個時候訪問智利同巴西，尋日仲要喺自己網誌寫「遊記」，以帶香港商貿高層代表團訪問智利同巴西做引子，文章分十段，最長嗰段係一篇長長嘅外訪「政績」清單流水帳：○七年訪馬來西亞，探討伊斯蘭金融業務；○八年訪印度，「增加了往來航班，雙邊貿易即如立竿見影般大幅增長」；○九同二○一○年先後訪問俄羅斯嘅歐洲同遠東地區，吸引俄資來港上市，「俄鋁不久就到港掛牌了」……

扮晒招財貓 網誌認叻

鬍鬚曾作為財金高官，咁樣自吹自擂，仲講到自己好似招財貓咁，但事實係點呢？好似鬍鬚曾曾經矢言進軍伊斯蘭金融業務，最後雷聲大雨點小，冇咗下文，到真正做出成績先至攞出嚟晒啦，唔該！再講，佢成日對財赤、通脹同經濟走勢計錯數，可謂劣績斑斑，竟然連外訪旅遊都當政績，真係打腫塊面充大頭。

古代賢人以天下為己任，鬍鬚曾喺網誌話自出任財爺以嚟，就「以為香港開拓新興市場、尋找新商機為己任」。講到好偉大，但係佢有冇諗過，佢做財爺咁耐，香港貧富懸殊日趨惡化，樓市瘋狂飆升，又話香港處於被動，對通脹又束手無策，搞到市民怨聲載道，如果鬍鬚曾真係以天下為己任，應該辭職讓賢，而唔係為自己臉上貼金。去到網誌結尾，鬍鬚曾曲線認叻，話金融海嘯後，世界經貿格局發生明顯變化，進一步證明佢開拓新興市場嘅路向係啱嘅，「以後會繼續更多開拓行動」，即係預告，鬍鬚曾嘅貼金行動陸續有嚟！