求救電話如虛設 行山隨時搵命博

遠足行山係好多市民嘅興趣，話時話，遠離都市煩囂，欣賞自然景色，呼吸清新空氣，確係一項有益身心嘅活動。不過行還行，安全至上，正如政府廣告話齋，「郊遊前，準備好，聯繫方法要知道」，即係提醒大家遠足前要做足準備，遇到緊急事故要識得求救咁話。

講就係咁講，但點樣求救呢？呢，日前有位市民去粉嶺蝴蝶山徑遠足，行行吓腳抽筋，於是跟足廣告指示，用緊急求助通話器求救，點知打極都唔通。好彩佢傷勢唔算重，可以自己慢慢行落山咋。

叮！話明緊急求助通話器，梗係用嚟救命嘅啦，點可能咁兒戲打極唔通呢？更加得人驚嘅係，唔只一個唔通，原來蝴蝶山徑四個緊急求助通話器全部壞晒，而港島徑亦有一部通話器失靈，至於全港郊野公園究竟有幾多通話器形同虛設，根本冇人知。所以話，行山人士最好自求多福，千祈唔好有事，否則隨時叫天不應，叫地不靈。

冇錯，任何機器都會老化，都會壞，但如果當局加強巡查，亡羊補牢，都冇咁驚吖。漁護署話喎，署方每個月都會派人巡查緊急求助通話器，一發現有問題就交畀電訊公司跟進。雖然電訊公司承諾修復蝴蝶山徑嘅通話器，但因為挖掘工程需要政府批准動工，最快都要等到一月七號先至恢復正常。

叮，緊急求助通話器打唔通，隨時危及行山人士安全，當局照計應該盡快批准電訊公司動工，點解仲要拖嚟拖去呢？萬一期間有人出事，邊個孭鑊先？

本來呢，緊急求助通話器打唔通，市民仲可以用手提電話求救，可惜好多熱門行山地點到依家仲係手機盲點，有啲甚至連九九九都打唔出。○五年先後有兩位行山人士因為手機失去聯絡出事，電訊管理局誓神劈願話會加強手機網絡，殊不知，本報記者年前去八仙嶺行山徑睇過，發現依然存在手機盲點。

叮，聽講連喜馬拉雅山都可以收到手機訊號，反而香港咁細嘅地方仲有咁多盲點，真係失禮死人。難為港府近年仲大力推廣行山，話要令綠色旅遊成為本港旅遊業嘅未來發展路向喎。問題係，咁多地方唔止手機打唔通，連緊急求助通話器亦形同虛設，咁又點樣推廣綠色旅遊吖？查實，維修通話器又好，加強手機網絡又好，都係好簡單啫，好心港府快快趣趣搞掂佢啦！