政情：阿Ron任總馬場搶晒鏡
配飾可以增添時裝嘅魅力，尋日沙田馬場舉行元旦日賽馬，同時舉行一年一度嘅華商會挑戰盃，港交所主席夏佳理（Ron）、前金管局總裁任志剛夫婦都有入場，佢哋件元旦戰衣仲好養眼添。
天文台一早話明元旦日好凍吓，尋日入馬場嘅名人都做足保溫措施，阿Ron喺西裝外加咗條絲質頸巾，仲係紫藍色嘅添，配埋佢條粉紅色呔，夠晒搶鏡。任總都唔弱，着咗件灰色絨面西裝入場，輕易喺一眾男士嘅黑色、藍色西裝中突圍而出。
尋日嘅華商會挑戰盃由短途新星「小橋流水」奪得，華商會所主席黃守正話總獎金高達二百三十萬，全數由馬會支付。
阿Ron紫藍色頸巾配粉紅色呔，非常搶鏡。
任總離開金管局後風采依然，尋日拖埋太太入馬場湊熱鬧。