政情：袋巾傑囡囡有意做傳媒
政圈因為「維園阿哥」任亮憲單案刮起桃色風暴，更成為有意從政嘅年輕人警號。公文袋候任黨魁梁家傑嘅囡囡依家喺英國劍橋大學讀緊政治學學士，將來隨時會追隨爸爸踏入政壇。問佢有冇因應今次事件特別提點吓囡囡，袋巾傑好淡定咁話，囡囡一向好乖好識諗，完全冇咁嘅需要，擺到明對個女有百分百信心。
佢個乖女來年就會畢業，有意繼續進修，亦未決定會返香港定留喺英國，不過早前有當地通訊社請佢做實習，遠赴聯合國採訪，囡囡做完後覺得好有趣同有意義，話唔定畢業後會做番傳媒呢行。
歐洲早排大風雪，搞到好多留學英國嘅港人子女返港受阻，袋巾傑嘅囡囡同一對孖仔都喺英國讀書，但佢哋早咗返嚟，所以冇受影響。
袋巾傑同囡囡喺○六年嘅合照，當時囡囡仲係好小朋友，依家應該唔同晒喇。 （資料圖片）