政情：建制派組人牆保政改
立法會今年嘅重點工作之一係政改本地立法，負責審議本地立法嘅立法會委員會至今已有多達三十一名議員報名，即係過半數立法會議員都會加入，其中二十人嚟自建制派，幾乎係泛民主派委員數目嘅兩倍。佢哋組成人牆，無非都係避免重演上次《競爭條例草案》角逐委員會副主席大意失荊州一幕，費事本地立法搞出大頭佛。
個委員會報名至除夕晚結束，據講二十三名泛民議員中有啱啱唔夠半數報名，其中白鴿黨同公文袋分別派出四人，仲有民協馮檢基、公民起動何秀蘭同獨立議員鄭家富。建制派政團富貴黨、工聯會、經濟動力、專業會議同「五散人」，各出動至少一半成員入會，反而建仔得兩個人。
呢個草案委員會嘅主席好大可能由建仔主席譚耀宗出任，副主席就係兵家必爭之位，建制派人多打人少，勝算已經在握啦。