政情：田二少同大佬只談風月

退黨鬧出連串風波後，田二少田北辰同富貴黨嘅關係好受關注，尤其係佢面對大佬田北俊時會點呢？尋日元旦日，田二少接受個電台訪問，佢透露退黨之後，已經冇同大佬（田北俊）再講政治，大家見面只係食飯、傾閒偈，佢話到明：「如果唔想夜晚瞓唔着覺，最好將政治同家庭分開。」原來家吓田氏兄弟相聚只談風月、謝絕政治。

出身商界、本身亦係大老闆嘅田二少喺節目自爆，佢好多朋友都唔認同佢嘅政治立場，話佢太左，甚至太幫勞工階層，佢同呢啲朋友食飯見面時，都會傾呢啲嘢，但唔會餐餐飯都辯論，有啲朋友亦係講過一次就算。關係更加密切嘅大佬又點呢？佢就話，退黨後已經冇同大佬講政治，費事敏感啦。

田二少解釋，佢嘅立場係唔會逢老闆就支持，亦唔會逢勞工就支持，絕唔會立場偏埋一邊。講到呢度，佢亦唔點名以富貴黨嘅兩條腿走路政策嚟解畫：「我都支持兩條腿走路（即一邊直選，一邊功能界別），但千祈唔好係長短腳，否則走路拐吓拐吓就唔好啦。」