政情：陳晴自製月曆晒溫馨
新年到，又係時候換個新月曆，前港澳辦副主任陳佐洱女兒、海洋公園保育基金主席陳晴（Judy），今年特別製作咗精美座枱月曆，收錄多張佢同小寵物嘅溫馨圖片，幾得意㗎！
呢份月曆入面，大部分圖片係Judy本人或者同寵物狗仔、大熊貓嘅合照，月曆底座以精美盒裝設計，內裏載有一疊備忘紙張，而每月月曆背面仲印有中國農曆對照同「宜忌」資料，非常實用，啱晒佢喺內地定居嘅爸爸陳佐洱用。
懷有身孕嘅Judy上個月底已經係預產期，踏入新一年分分鐘已經做咗人哋媽咪，不過月曆圖片中嘅佢就未見好發福，只見佢攬到啲寵物實一實，一臉幸福。
陳晴自製精美座枱月曆送畀各方好友，用咗自己同小狗嘅相片做封面。