政情：職工盟謀政工分家

踏入二○一一年，政圈一片磨拳擦掌之聲，職工盟秘書長兼立法會議員李卓人尋日發出第一炮，宣布正構思將職工盟分家，即係將職工盟嘅工會同問政角色分家，邁向籌組工黨培育新人參政之路。呢個構思好似分拆公司同重組架構咁，冇可能好似魔術師咁一變就搞掂，阿人仲話最大問題係錢作怪，因為職工盟角色一分為二後，需要好多資源去養一個黨，如果加會費實搞到內部同屬會反彈，所以阿人都要慢慢度。

加會費勢惹反彈

阿人喺元旦日出席一電台節目時大講職工盟接班問題，佢老婆兼職工盟原總幹事鄧燕娥已經喺個位做咗十四年，早前劈炮，工會先招聘新人接班。不過，阿人認為，呢個只係工會事務嘅接班安排，至於職工盟喺立法會嘅政治角色同接班安排，都要開始部署。

佢透露，諗緊將職工盟嘅工會同從政角色分開，職工盟內部亦已展開討論，但暫時都好初步，最大問題就係經費來源，因為依家工會嘅財政情況已經唔係好豐裕，搵乜嘢嚟支撐一個政黨呢？如果加會費嘅話，好可能引起工友同屬會嘅反彈，所以佢哋都要深思。

阿人點激歌冧太太

香港好多政圈人士都諗過做工黨之父，遠嘅有當年仲喺白鴿黨嘅前職工盟主席劉千石，近啲有上屆立法會嘅工聯會議員鄺志堅，以至早前退出咗公文袋嘅前立法會議員張超雄等，不過統統最後都成唔到事。今次阿人又拋建議，可行性有幾高呢？若單以勞工網絡同組織性嚟睇，職工盟絕對有組黨嘅先天優勢，至於糧草問題，佢哋亦可能係咁多揚言要搞工黨嘅人士當中稍具實力嘅一群。

講完分家之後，阿人都藉節目向太太表心意，解釋太太辭職純粹係方便職工盟接班，跟住點咗首充滿抗爭味道嘅《抗戰二十年》畀太太聽，雖然冇柔情，但不乏激情，或者呢啲就叫另類浪漫啩。