淫媒煽風點火 唯恐天下不亂

新年伊始，港人都希望今年社會和諧，少啲爭拗，多啲快樂。不過咁，對於自認契弟嘅人嚟講，愈墮落愈快樂，所以，佢哋係都要搞風搞雨，係都要搞亂香港。

呢嗱，淫賤黎旗下嘅爛果報妖言惑眾，又玩唱衰嘞，可惜今次玩得認真低章，諗住煽動仇富仇商情緒，點知古仔一篤就爆，結果唱衰唔到人哋，反而自暴其醜。

話說長和系主席李嘉誠重建深水灣道大宅，啱啱獲批入伙紙，爛果報就大肆報道話李家大宅獲贈近萬呎樓面，仲假借網民及聽眾嘅所謂意見，話政府放水、優待富豪、巧取豪奪，甚至連官商勾結同利益輸送都出埋，有咁大作到咁大。

叮！真的假不了，假的真不了，謠言重複一千次始終都係謠言。真相係點呢？真相係李家新大宅可住樓面只有九千幾呎，所謂獲贈近萬呎樓面，根本就係子虛烏有；仲有吖，所謂豁免呎數，絕大部分係將露天車位變成有蓋車位，而且已向政府補地價五千四百幾萬元。正如業界人士話齋，同類工程就算普通人亦可以申請得到，而且補地價金額可能更低添。事實證明，成件事根本唔存在所謂優待，而贈送嘅講法更加係無厘頭。

有人直斥爛果報嘅報道完全係笑話，其實，爛果報攞呢件事大做文章，點止笑話咁簡單吖。例如李家早就向政府補咗地價，但爛果報提都唔提，反而刻意藉市民對樓價飆升嘅不滿，用不盡不實嘅數字混淆是非，煽風點火，以達到不可告人嘅目的，實在夠晒卑鄙。

話時話，香港開埠百幾年，以前從未聽過仇富仇商呢回事，近年之所以搞到社會矛盾惡化，烏煙瘴氣，正正係唯恐天下不亂嘅壹淫媒不斷煽風點火造成。係人都知，淫賤黎之所以長期惡意針對李先生，完全係酸葡萄心理作怪，人哋不屑與呢種卑鄙小人為伍，拒絕喺誨淫誨盜、反中亂港嘅爛果報落廣告，佢就發晒爛渣，公器私用，一時唱衰，一時抹黑，無所不用其極。

其實，講到獲政府優待，絕對冇人比得上淫賤黎。佢旗下嘅壹淫媒違反《淫褻及不雅物品管制條例》過百宗，但次次都獲當局放生，罰款輕則幾千蚊，重亦不過幾萬。仲有吖，同一輯照片，其他報紙登就被評為二級不雅，爛果報登就乜事都冇，除咗壹淫媒，試問仲有邊個可以享受咁嘅禮遇？

計太一叮話齋，真真正正獲港府優待嘅唔係第二個，而係淫賤黎；香港有冇官商勾結好難講，但官淫勾結就絕對有。叮！