政情：黃金寶揮筆添單車身價
尋日係大除夕，精英運動員協會舉行咗第十屆毅力十二愛心跑，由下晝四點一直跑到午夜十二點，以迎接新一年來臨，同時亦為精英運動員慈善基金同再生會籌款。中港體育好手同體育界名人紛出錢出力。
活動除跑步外，仲有慈善義賣。有攤位捐出一架價值千八蚊嘅單車畀大家競投籌款，「亞洲車神」黃金寶喺單車兩邊車身簽名，結果合和實業董事總經理胡文新、精英運動員協會會長胡經昌同體育界名人許晉奎二話不說每人捐二千蚊競投，不過佢哋只係出錢，並冇攞走架單車，留番架單車畀其他善心人再投過。
黃金寶（前）喺單車上簽名，胡經昌（左一）、胡文新（左二）同許晉奎（右二）各自捐出二千蚊競投單車，再捐番出嚟投過。