政情：傅家俊申亞立場矛盾

政府就申亞撥款硬闖立法會嘅日子愈嚟愈近，民間反對聲音仍然高漲，有「神奇小子」之稱嘅香港桌球好手傅家俊，尋日都對申亞好有保留，仲質疑香港究竟「能唔能夠搞一個成功嘅亞運會」，佢直認對呢件事嘅立場好矛盾，睇佢嘅態度真係寧願投白票好過。

神奇小子尋日話：「我好矛盾，又想搞，但係民意好似唔係好贊成，又驚搞得唔好。如果民意又贊成又搞得好，我舉腳贊成添啦！」不過，佢都引廣州或倫敦嘅經驗為證，話廣州辦亞運需要好多配套，即使有國家做後盾，一樣有出錯。倫敦搞奧運除鬧出超支醜聞外，場地又起到亂七八糟，所以佢苦口婆心咁話：「我唔想香港去到嗰時（二○二三年），好似依家倫敦咁。」

講開又講，立法會財委會已定喺呢個月十四號表決申亞撥款，咁啱嗰日港區全國人大代表同全國政協委員要拉大隊上深圳開「兩會」預備會。人大政協當中，建仔立法會議員有四個，一向反對申亞嘅建仔主席譚耀宗話，即使缺席預備會，建仔成員都會留番喺香港投票，絕不退縮喎。