政情：張國柱去佛山行山
好多人趁聖誕出遊，社會福利界議員張國柱都偷閒同太太去玩，佢哋報名參加一個廣東省行山團，三日行足兩日半。
阿柱兩公婆早前去咗佛山同三水三日，全程主要行山，參加嘅團員有成百人。一團人浩浩蕩蕩，每日最少行五粒鐘，最長一日行成八粒鐘，腳骨力少啲都跟唔上。阿柱話當地空氣清新，行山時特別精神爽利，呢啲感覺喺香港好難感受到。既然兩公婆都咁鍾意行山，唔知邊個體能好啲呢？阿柱就話：「梗係老婆好啲啦，佢平時星期六、日都會行嘛！」
唔講唔知，阿柱原來已有十年行山經驗，好多內地嘅名山佢都去過，有啲仲有原始森林feel添，佢仲好開心咁話今次行程好正：「總之唔使開會就正㗎喇！」
