政情：沈祖堯遊滬冇眼睇

啱啱過去嘅一年，中國經濟實力大增，以產值計已經做咗全球二哥，到處都有大國崛起之聲。不過，啱啱喺兩個月前結束嘅世博會又暴露咗中國人質素參差同人文修養唔入流嘅缺點，沙士英雄兼中文大學校長沈祖堯日前寫咗篇題為《上海三十年》嘅網誌，藉文章表達佢對國家國力昌盛、國人質素未見同步提升嘅感慨，仲期望三十年後再去上海時，可以睇到一個泱泱大國嘅國民有令人羨慕嘅修養同情懷。

沈校長喺篇網誌度話，爸爸係上海人，四九年大陸解放後到咗香港定居，父母八十年代初帶埋佢同細佬兩兄弟回鄉探親，記憶之中，當時上海舊樓林立，而由上海去杭州、蘇州同無錫嘅火車更加得人驚，隨地都係痰同垃圾，車內空氣令人完全唔想呼吸。

「金錢有時比誠信重要」

啱啱過去嘅暑假，佢故地重遊，兼去上海睇世博會，呢一次，佢驚訝當地發展速度驚人，國家亦變成世界上最富有嘅地方之一，國人嘅享受應有盡有，「我們的『自尊』隨着經濟發達而不斷脹，但我們的本質是沒有變」。校長睇唔過眼嘅事包括：爭先恐後嘅場面喺街道上、商店裏隨處可見；問路、買票亦會碰上「不要煩我」的面孔；最令佢感到憂慮嘅似乎係「金錢有時比誠信、良心、友情還重要」，所以沈校長覺得，國家需要嘅係優質教育同價值觀嘅重新高舉。

沈校長早前先寫咗篇題為《強國必先強教》嘅網誌，喺嗰篇長逾千字嘅網誌中，佢已經直指教育制度同教育管理對一個國家嘅重要性，呼應國家領導人對強國需要先強教育嘅講話，新一年將至時，沈校長又喺兩日前寫咗呢篇《上海三十年》，可見佢對國家邁向泱泱大國嘅關注同寄望！不過，沈校長對國人提升質素嘅目標係三十年，中國人真係要努力喇！