三輪車不准載人　運輸署迂腐擾民

咪話唔提醒各位，一家幾口去郊外踩單車輕鬆吓，隨時會犯官非。呢，如果租架三輪單車，老竇做「柴可夫」，阿媽同仔仔坐後面，踩踩吓可能會被警察截停落車，唔好彩嘅仲可能要罰款兩千蚊添。

咁都得？嗱，踩單車本身唔犯法，踩兩個輪、四個輪都OK，唯獨踩三輪單車載人就違法，因為有條N年前嘅舊例話唔得。咁就奇嘞，呢啲三輪單車本身設計就為載人，唔係攞嚟做乜？對唔住，呢個唔係官府要考慮嘅問題，總之揸正嚟做一定罰硬。

有被警察截停嘅市民覺得好無奈，早知一家幾口各自租單車踩好過。業內人士話，雖然法例規定所有單車同三輪單車不得運載其他人，警員多數會勸喻遊客落車就算數，好少真係票控，形容有關條例「擾民」，令市民同警察都難做。

由於當局好少依例執法，好多人根本唔知有條咁嘅法例，長洲唔少居民都有三輪單車，電視台仲試過租呢種車拍攝介紹離島遊節目添，咁咪即係公然犯法？

三輪單車專門為載人設計，有工程師話，三輪單車載人之後車身重心在後，翻側機會微乎其微，可以話基本上好安全。既然三輪單車咁受市民歡迎，當局應該修訂過晒時嘅法例，避免窒礙鄉郊旅遊業發展吖。正如立法會議員王國興話齋，條例已經過時，建議當局重新檢討，譬如修訂批准喺休憩地區同單車徑載人行走。

不過，運輸署嘅回應都幾無厘頭，話載客三輪單車會影響駕駛者體力、技術、平衡力等，基於道路安全，有關規例依然合適喎。三輪單車載人唔出得街，你話運輸署係咪迂腐吖？叮！

查實，三輪單車遊覽喺其他地方好常見，除咗著名嘅北京三輪單車胡同遊，馬六甲、澳門同越南等地十分流行。既然人哋可以管理得企企理理，當三輪單車係旅遊業生招牌，點解香港唔得，連修訂法例都懶做？

不過講開又講，如果成功修例，三輪單車反而真係有危險。何解？因為本港啲單車徑唔只唔連貫，好似斷橛禾蟲咁，更加係危機四伏，陷阱處處。本報記者早排喺全港多條熱門單車徑追擊發現，急彎缺乏廣角鏡，又冇指示牌，即使有都係標示不清，單車徑到巴士站突然終止、運輸署懶於維修同無人執法巡查等。

你話嘞，單車徑搞成咁，莫講三輪單車，乜輪單車都牙煙啦。計太一叮話齋，陳年舊例固然要改，改善單車徑更加唔可以偷雞。為咗市民身心健康同郊遊安全，唔該官府快快做嘢！