政情：阿牛釣得19斤大鱸魚
社民連面對內憂外患，黨員「阿牛」曾健成就放低擾人公務，趁住聖誕假去咗釣魚。尋日阿牛喺facebook貼咗佢同戰利品嘅合照，相中佢拎住一條大鱸魚，可見佢收穫豐富。阿牛好滿足咁話，條魚重達十九斤，僅魚春都有兩斤，夠畀五家人分享！
阿牛喺平安夜當日同成班親朋戚友，一齊坐船去到機場附近嘅海域垂釣，佢話呢段時間唔少魚去珠三角產卵，所以啲魚特別正。對釣魚甚有認識嘅佢用咗十幾磅力嘅魚絲，用蝦做魚餌，釣咗冇耐條大鱸魚就上釣。
阿牛心知魚絲承受唔起咁大條魚，加上條魚掙扎得好犀利，惟有轉交朋友幫手。不過阿牛嘅朋友都搞唔掂，最後要由艇家出手相助，經過十幾分鐘互搏後，大鱸魚終於上釣。結果條魚個魚頭、魚腩、魚春同部分魚肉，統統成為阿牛同家人嘅腹中物。