政情：袋巾傑偏私撐陳家洛

公文袋執委會下禮拜六改選，黨魁由立法會議員袋巾傑自動當選，但其餘三個高層職位都意外地出現競爭，當中以近年已淡出一線黨務嘅創黨元老鄭宇碩最矚目，佢突然報名同陳家洛爭做黨主席；同吳靄儀角逐內務副主席嘅「80後」黨員胡栢麟，早前亦因為新界西支部修章爭議，同陳家洛開過拖，反映黨內出現一股不滿陳家洛嘅情緒。

雖然公文袋對外宣稱今次係本港歷來首個泛民政黨出現主席差額選舉，證明佢哋有幾咁民主開放，不過袋巾傑尋日同傳媒茶敍時，卻令人覺得今次改選並非君子之爭咁簡單。

事關茶敍本來係講袋巾傑未來大計，但講唔夠幾句，就由佢助手代為宣讀陳家洛越洋發出嘅幾點聲明，澄清陳並非要透過參選主席染指立法會選舉。之後袋巾傑又大數陳家洛嘅功績，但完全冇提鄭宇碩。

袋巾傑強調為公平起見，公文袋今次特別成立咗個三人小組負責改選，同執委會劃清界線，確保各參選人都有均等機會向黨員宣傳拉票。但話口未完，佢就自爆早已同幾位黨內高層，聯署支持陳家洛嘅競選政綱並廣發全黨。佢咁做即係明撐陳家洛啦，又何來公平中立呢？

佢解釋，聯署時唔知鄭宇碩會報名喎，真係好難令人相信。其實如果陳家洛真係穩勝，就毋須袋巾傑打破中立出嚟力撐啦！