政情：爭業界利益 各懷鬼胎 五散人五條心

立法會內最近有鋪組黨潮，先有匯賢智庫班底化身新民黨，後有西九新動力想同專業會議拉埋天窗，但喺議事廳內亦有人組極都組唔成，好似由醫學界、保險界、會計界、廠商會同資訊科技界代表組成嘅「五散人」，「行埋」兩年幾愈嚟愈散，多個政策投票上都箍唔實五票。

IT界代表「IT豪」譚偉豪尋日向傳媒主動提出支持下屆特首嘅條件，就係要成立創新及科技局，等政府有更專門嘅政策去做科技政策，實行開Turbo為業界爭取利益。不過呢個條件，比起紓緩貧富懸殊、協助市民置業議題，實在有啲「非主流」，佢深明散票冇人重視嘅道理，所以希望努力將五散人整合成一股強大力量，尤其喺未來兩年特首選委會同特首選舉上，可以五個人有一致取態支持某個候選人，到時就可以聯手施壓爭取業界利益。

未來特首人選各有心水

眾所周知，五散人中各有山頭，好似廠商會林大輝咁，支持嘅對象打風都打唔甩，而另一散人會計界陳茂波又好似對另一啲疑似特首候選人比較有興趣，所以IT豪話依家目標都係箍緊四票，起碼叫做爭取到最大版圖，但最後會傾向支持邊個，就要等各疑似人選出政綱先可以決定喎。只係五散人出名飄忽，最後有冇四票咁理想，真係要到選舉前先會明朗化。

咁同年嘅立法會選舉又點呢？IT豪話政客未來路向離唔開組黨，但佢○八年參選時承諾過唔會加入任何政黨，所以無論係加入新民黨，定係將五散人「升呢」做政黨，都要等一二年選舉後先決定。

但係諗參選之前，佢仲有單官司要解決，事關早前終審法院裁定，立法會選舉呈請結果可以上訴，意味○八年挑戰IT豪嘅莫乃光，可以一路上訴落去，IT豪話為官司已經使咗幾百萬元，見到單案沒完沒了，真係好頭痕。