古蹟係寶唔係草　活化用心兼用腦

中國歷史上有一塊著名嘅和氏璧，驟眼望落只係一塊平平無奇嘅石頭，經過工匠雕琢，終於成為一塊價值連城嘅寶玉。呢個故事話畀大家知，玉不琢，不成器，千祈唔好睇小石頭吖。

太一叮之所以諗起和氏璧，係因為九龍城亦有一堆石塊，經過考古學家查證，原來係百幾年前嘅龍津石橋遺址。土木工程拓展署建議，將龍津石橋同兩旁嘅通道活化成古蹟步行街，引入商店、茶樓等商業元素，重現當年龍津要道嘅熱鬧場面，畀遊客一邊行街shopping，一邊認識本土歷史。

香港旅遊業成日畀人批評景點老化，缺乏新意，家陣當局搞搞新意思，既活化古蹟，又添加商業元素，總算有啲創意。不過咁，創意還創意，最緊要腳踏實地，做好規劃，千祈唔好搞到虎頭蛇尾呀。

查實，香港歷史悠久，幾千年前已經有人居住，古蹟到處都係，只要好好發掘，景點多多都有。呢，沙頭角蓮麻坑村葉定仕故居，屋主係孫中山嘅親密戰友，間屋亦仿照孫中山故居建造，採用中式金字形瓦頂，糅合中西建築風格，好有保育價值。奇就奇在，葉氏後人多次要求當局修葺古宅，保育古蹟，港府一直當耳邊風，卒之拖到舊年先至列入法定古蹟，撥款復修。可惜，由於古宅日久失修，樓頂同地板都畀白蟻蛀晒，仲有大量蝙蝠飛出飛入，成個蝙蝠竇咁，可唔可以恢復原貌都成問題。

開講有話，古蹟唔保好易冇。葉定仕故居最終列為法定古蹟，總算有機會保留，大埔碗窰村就冇咁好彩喇。嗰度本來係明代嘅瓷器工場，中國境內唯一保存完整，甚至有可能復原嘅古窰遺址。雖然古窰被列為法定古蹟二十幾年，但係當局一直闊佬懶理，今年七月一場雨將大量文物沖落山腳底，救都救唔番，叮！

正所謂他山之石，可以攻玉，講到保育文物，日本嘅做法值得港府學習。呢，大家喺日本見到嘅歷史建築，大部分都係模仿中國唐代嘅建築風格，同類建築喺中國已經幾乎絕迹，而喺日本仲係隨處可見，成為著名旅遊景點。日本霸佔釣魚島抵鬧，但人哋保護文物嘅做法就抵讚啦。

日本人保育古蹟咁成功，係因為佢哋將古蹟文物視為「文化財」，即係祖宗留畀後人嘅寶貴財產，只要好好保護呢啲財產，就會有豐厚嘅回報，例如可以提升文化水平，可以刺激旅遊業，可以提升國際形象，總之好處多多。

一句講晒，事在人為。只要港府肯承擔，肯聽市民意見，龍津石橋可以復原，其他古蹟同樣可以保留，活化文物唔只唔難，仲充滿商機添！