香港西醫工會嘅「歌舞昇平聖誕夜」周年晚宴，行政會議成員「金刀梁」梁智鴻都有出席，佢話，平安夜同聖誕節兩日，一連去咗五個派對，真係節目多籮籮。
金刀梁嘅女捷華喺英國從事資訊科技保安工作，因為歐洲大風雪無法返港，所以今年係得曼谷工作嘅細仔可以返港同金刀梁兩公婆過節，不過，金刀梁好開通話，就算仔女趕唔到返港過節都無所謂，因為平時大家工作咁忙，通電話都可以緊密聯繫。其實佢個女上個月先專程回港，撐爹哋喺禮賓府攞大紫荊勳章，飛得咁密，算係咁喇。
梁智鴻（左二）囡囡捷華（右一）上月專程回港參加父親獲頒大紫荊勳章儀式。 （資料圖片）
