政情：搞搞政：北京-14℃ 凍僵克勤仔

寒流襲港，香港人連十度嘅溫度都嗌好凍，真係好難想像零下十度會點。立法會議員陳克勤前日同個學生團上咗北京，抵達北京後，就試到零下十四度嘅滋味，佢哋一行除咗嗌好凍外，個個行路都要不時跳吓暖身，睇怕佢哋返嚟之後會話香港呢啲天氣好舒服。

克勤仔今次帶領嘅團係新界青年聯會及香港傑出學生會一班大專生同中學生共一百七十人，佢擔任榮譽團長，另外仲有聯會主席陳恒鑌及副會長陳勇，佢哋落機首日已經覺得凍僵咗，幸好有當地人教路，保暖最緊要保住下身嘅溫暖，所以建議團員多着幾條褲，第二日佢哋個個着咗三、四條褲保暖，人人好似隻糉咁。

考察團未來幾日亦會參觀奧運鳥巢、水立方、長城、故宮等多個著名景點，本周四回港。身兼北區區議員嘅陳勇又話，完成今次考察團之後，會再帶六百名中學生參加高鐵之旅，度過一個有意義嘅聖誕及新年假期。