政情：劉秀成速寫立會製月曆

新一年將至，立法會建築、測量及都市規劃界代表劉秀成，畫則、速寫同攝影都有一手，每年都會親自設計同繪畫座枱月曆送畀朋友，年年主題都唔同，出年嘅原來係速寫現時嘅立法會大樓。劉秀成話，立法會明年就會搬遷到金鐘添馬艦，所以希望透過月曆同大家分享佢喺大樓嘅點滴回憶。

佢製作嘅二○一一年月曆封面以立法會大樓及舊滙豐銀行總行做背景，每個月份嘅插圖就包含立法會大樓內外多個重要藝術建築部分，包括每個星期三開大會用嘅會議廳同上方嘅大型吊燈，以及豎立喺大樓頂部嘅泰美斯女神雕像等。劉秀成又一併收錄埋大樓四周嘅著名建築，包括皇后像廣場、中銀大廈、長江中心等，用作襯托大樓嘅新古典建築風格，同時凸顯出大樓嘅所在位置。

過去佢搵過好多建築物做月曆主題，譬如舊年就用咗考察捷克布拉格時影下嘅相片，今年又速寫香港嘅舊建築物以提倡保育，真係議會有心人。